Masallı rayonunun Xallıcallı kəndində əkin sahələrini su basıb.
Cenublu.az xəbər verir ki, bu barədə kənd sakini Gülağa Şirəliyev məlumat verib. Onun sözlərinə görə, Viləşçay vasitəsilə kənd ərazisinə daxil olan qar suları əkin sahələrində toplanıb və nəticədə onlarla hektar taxıl sahəsi su altında qalıb. Oxşar vəziyyət kəndin daxili ərazilərində də müşahidə olunur.
Bildirilib ki, çay suyunun birbaşa daşqın yaratmamasına baxmayaraq, yaşayış evlərinin yaxınlığında suyun toplanması həyətyanı sahələrə keçmə təhlükəsi formalaşdırır.
Yerli sakinlər bildirirlər ki, problemin əsas səbəblərindən biri kənddə əvvəllər mövcud olmuş su anbarının təyinatının dəyişdirilərək əkin sahəsinə çevrilməsidir. Onların sözlərinə görə, su anbarının fəaliyyət göstərməməsi nəticəsində çay vasitəsilə gələn qar suları kənd ərazisində əkin sahələrini su altında qoyur.
