Lənkəran şəhərinin 2-ci mikrorayon ərazisində yerləşən 6, 7 və 9 nömrəli binaların qarşısında məişət tullantıları yenidən yığılaraq sakinlərin narazılığına səbəb olub.
Cenublu.az xəbər verir ki, bir müddət əvvəl həmin ərazi ilə bağlı hazırlanan videoreportajdan sonra aidiyyəti qurumlar ərazini tullantılardan təmizləmişdi. Lakin cəmi bir neçə gün keçməsinə baxmayaraq, tullantılar vaxtında daşınmadığı üçün ərazi yenidən zibillə dolub.
Vətəndaşların sözlərinə görə, yay istisində ətrafa yayılan üfunət səbəbindən mənzillərin pəncərələrini açmaq mümkün olmur. Gecə saatlarında isə zibil yığınının ətrafına toplaşan sahibsiz itlər həyət sakinlərinin təhlükəsizliyi üçün ciddi risk yaradır.
Bundan əlavə, məişət tullantıları üçün mişar daşlarından tikilmiş tullantı meydançasının bir tərəfi dağıldığından zibil ətrafa səpələnir və antisanitar vəziyyət daha da ağırlaşır.
Şikayətçilər bildirirlər ki, əsas problem tullantıların vaxtında daşınmamasıdır. Onlar aidiyyəti qurumlardan əraziyə daimi nəzarətin təmin edilməsini, zibil maşınlarının daha tez-tez cəlb olunmasını və tullantı meydançasının bərpa edilməsini tələb edirlər.
