Saatlı rayonunun Soltanabad kəndində suvarma suyunun verilməməsi fermerləri ağır vəziyyətə salıb.
Cenublu.az xəbər verir ki, kənd sakini Ruhid İslamovun sözlərinə görə, vaxtında suvarılmayan pambıq sahəsi susuzluqdan məhv olmaq üzrədir. O bildirib ki, dəfələrlə Saatlı Suvarma Sistemləri İdarəsinə müraciət etsə də, problemin həlli istiqamətində heç bir tədbir görülməyib.
Fermer qeyd edib ki, yaranmış vəziyyət nəticəsində həm məhsulunu, həm də gəlirini itirmək təhlükəsi ilə üz-üzə qalıb. O, həmçinin pambıq zavoduna olan 15 min manat borcunu necə ödəyəcəyini bilmədiyini deyib.
Şikayətçilərin sözlərinə görə, problem təkcə əkin sahələrini deyil, bağ-bağat sahələrini də əhatə edir. Suvarma suyunun verilməməsi kənd təsərrüfatına ciddi ziyan vurur.
Vətəndaşlar aidiyyəti qurumlardan suvarma suyunun kəndə vaxtında verilməsini və problemin qısa müddətdə aradan qaldırılmasını xahiş edirlər.
