Lənkəranda qəsəbə sakinləri şəhər mərkəzinə gedib-gəlməkdə çətinlik çəkirlər. Bu haqda bu gün, 17 avqust tarixində Cenublu.az-a sakinlər müraciət ediblər.
Sözügedən problem Şirinsu qəsəbəsində yaranıb. Oxucularımız bildirirlər ki, qəsəbəyə marşrut xətti işlərmir.
“Masallıdan Lənkərana gedən “Qazel”lər Şirinsudan keçirlər, lakin həmin avtobuslar ilkin dayanacaqlarından tam dolmamış çıxmırlar. Buna görə də, Şirinsuya gələndə artıq avtobusda yer olmur. Tək ümid qalır Lənkəran-Qızılağac marşrutuna, o da ki, sayı az olduğundan, sərf etmir”, - deyə qəsəbə sakini qeyd edir.
Verilən məlumata əsasən, Şirinsuda yerləşən təhsil ocaqlarında Lənkəran və Liman şəhərində yaşayan müəllimlər çalışırlar. Onlar da buraya gəlməkdə əziyyət çəkirlər. Universitetə və kurslara gedən tələbələr məcbur qalıb taksi və ya yol maşınlarından istifadə edirlər.
Sakinlər tez bir zamanda Şirinsu qəsəbəsinin marşrut xətti ilə təmin olunacağına inanırlar.
