Salyan rayonunun Alçalı kənd sakini, 1964-cü il təvəllüdlü Xalıq Yarəhməd oğlu Əsədov bir neçə aydır əlillik pensiyasını ala bilmədiyini bildirir.
Xalıq Əsədovun sözlərinə görə, o, 2021-ci ildən 2026-cı ilin fevral ayınadək II qrup əlilliyə görə aylıq 250 manat pensiya alıb. Əlillik müddəti başa çatdıqdan sonra növbəti qiymətləndirmə aparılsa da, ona nə pensiyanın yenidən təyin olunması, nə də imtina ilə bağlı hər hansı rəsmi məlumat verildiyini deyir.
Onun sözlərinə görə, sərbəst hərəkət etməkdə çətinlik çəkir və gündəlik həyatında köməyə ehtiyac duyur. Ailə üzvləri bildirirlər ki, hazırda maddi vəziyyətləri ağırdır. Xəstə isə həyatı üçün vacib olan dərmanların yarısını belə ala bilmir.
Məsələ ilə bağlı Əlilliyin Bərpası və Reabilitasiya Mərkəzindən Cenublu.az-ın sorğusuna cavab olaraq bildirilib ki, Xalıq Əsədovun əlillik müddəti 19 fevral 2026-cı il tarixində başa çatıb. Qurumun məlumatına görə, onun əlilliyinin yenidən qiymətləndirilməsi üçün indiyədək heç bir müraciət daxil olmayıb.
Açıqlamada qeyd olunub ki, vətəndaş ilk növbədə qeydiyyatda olduğu poliklinikaya müraciət etməlidir. Tibb müəssisəsi tərəfindən müvafiq tibbi sənədlər (Forma-88) elektron sistemə göndərildikdən sonra qanunvericiliyə uyğun şəkildə əlilliyin təkrar qiymətləndirilməsi aparılacaq və nəticəyə əsasən müvafiq qərar veriləcək.
