Masallıda “Qəhrəmanlarımızı tanıdaq” layihəsi çərçivəsində qazi ziyarət olunub. Bu haqda bu gün, 28 iyul tarixində Cenublu.az Masallı Rayon İcra Hakimiyyətinə istinadən xəbər verir.
“Masallı Gənclər Evi” sosial xidmət müəssisəsinin kollektivi ll Qarabağ müharibəsi qazisi Quliyev Şadıman Şamxal oğluna baş çəkiblər. Ziyarət zamanı qazimizin keçdiyi şərəfli döyüş yolundan söhbət açılıb, qayğıları dinlənilib. Quliyev Şadıman Vətən müharibəsi başlandığı gündən etibarən şəxsi heyət arasında qələbəyə inamın yüksək olduğunu bildirib.
Fəxrimiz Quliyev Şadıman 12 yanvar 2002-ci il tarixində Masallı rayonunun Həsənli kəndində anadan olub. O, 2008-2019-cu illərdə Masallı rayon Həsənli kənd tam orta məktəbində təhsil alıb və hazırda Masallı Dövlət Regional Kollecinin tələbəsidir.
Döyüşlərdə fəal iştirak edən qazimiz “Kəlbəcərin azad olunmasına görə”, “Füzulinin azad olunmasına görə”, “Xocavəndin azad olunmasına görə”, “Cəbrayılın azad olunmasına görə”, “Vətən müharibəsi İştirakçısı”, “Şücaətə görə” və “İgidliyə görə” medalları ilə təltif olunub.
