Masallıda 6 kəndi birləşdirən yolun yarasız halda olmağı sakinləri narahat edir. Bu haqda məlumat bu gün, 3 yanvar tarixində Baku TV-də paylaşılıb.
Rayonun Təklə kəndində əsas yolun asfalt örtüyü dağılıb. 5 kilometr uzunluğu olan yol 4 ildən çoxdur ki təmir olunmur. 2000-dən çox sakin yağışlı havada palçığın içindən keçərək, hərəkət edirlər.
Məlumatda bildirilir ki, sakinlər yolların təmiri ilə bağlı dəfələrlə aidiyyəti qurumlara müraciət etsələr də, müsbət cavab ala bilməyiblər.
Təklə kənd bələdiyyə sədri Pərvin Eyniyev bildirib ki, ərazidə kəndin mal-qarası, təsərrüfat texnikası tez-tez keçdiyinə görə bu cür problem yaranır. Pərvin bəy bununla bağlı İcra Hakimiyyətinə məktub yazdıqlarını qeyd edib.
Baku TV əməkdaşları Avtomobil Yolları Dövlət Agentliyinə müraciət ediblər. Cavab olaraq agentliyin sözcüsü Anar Nəcəfli bildirib ki, "28 yaşayış məntəqəsini birləşdirən Təklə-Həsənli-Köcəkli-Balatəklə-Şərəfə-Qədirli-Hüseynhacılı-Öncəqala-Viləş-Təzəkənd avtomobil yolunun yenidən qurulması dövlət proqramına salınıb. 59 kilometr uzunluğu olan bu avtomobil yolunun yenidən qurulması ilə bağlı maliyyə vəsaitləri ayrılan kimi yenidənqurma işlərinə başlanılacaqdır."
