Lerik rayonunun Peştətük, Vizəzəmin, Sipyəreğon, Kıncıvo, Cənginəvud və Kornədi kəndlərinin sakinləri yol problemindən şikayətçidirlər.
Musavat.cоm xəbər verir ki, sakinlərin sözlərinə görə, bu kəndləri birləşdirən 9 kilometrlik yol 1986-cı ildə "soyuq asfalt" üsulu ilə çəkilib və hazırda demək olar ki, yararsız vəziyyətdədir. Onlar bildirirlər ki, dəfələrlə öz vəsaitləri hesabına yola çınqıl töksələr də, yağışlı havalarda yol yenidən palçığa çevrilir, hərəkət çətinləşir, nəqliyyat vasitələri sıradan çıxır və məktəblilər əziyyət çəkir.
Sakinlər məsələ ilə bağlı Azərbaycan Avtomobil Yolları Dövlət Agentliyinə (AAYDA) müraciət etdiklərini, lakin problemin həllini tapmadığını deyirlər. AAYDA-nın mətbuat katibi Anar Nəcəfli isə bildirib ki, sözügedən yollarla bağlı təkliflər hazırlanaraq investisiya proqramına təqdim olunub və proqram təsdiqləndikdən sonra yolların əsaslı şəkildə yenidən qurulması nəzərdə tutulur.
