Bu gün Azərbaycan Silahlı Qüvvələrinin leytenantı, şəhid Mehman Mirəziz oğlu Şirvanovun ad günüdür.
Mehman Şirvanov 1980-ci ildə fevralın 24-ü Lənkəran rayonunun Ürgə kəndində anadan olub. Ailəli idi.
M.Şirvanov 1998-2002-ci illərdə Bakı Ali Birləşmiş Komandanlıq Məktəbində oxuyub. O, 23 il ərzində Naxçıvan, Yevlax, Tərtər və Goranboy rayonlarında xidmət edib. Xidmət dövründə bir sıra xarici ölkələrdə, o cümlədən Rumıniyada, Türkiyədə və NATO tərəfindən təşkil olunan ixtisasartırma kurslarına qatılıb. 2016-cı ildə Aprel döyüşlərində böyük igidlik göstərib.
Mehman Şirvanov Azərbaycan Silahlı Qüvvələrinin Yevlax rayonunda yerləşən "N" saylı hərbi hissənin zabiti idi. O, Vətən müharibəsində döyüşüb və sentyabrın 27-də şəhidlik zirvəsinə ucalıb. Lənkəran rayonunda dəfn edilib.
Ölümündən sonra "Vətən uğrunda", "İgidliyə görə" və "Suqovuşanın azad olunmasına görə" medalları, həmçinin "Qarabağ" ordeni ilə təltif olunub.
