Lənkəran şəhərinin Nizami küçəsində yaşayanlar uzun illərdir davam edən elektrik enerjisi problemindən şikayətçidirlər.
Cenublu.az xəbər verir ki, şikayətçilərin sözlərinə görə, ərazidə gərginliyin zəif olması səbəbindən evlərdəki elektrik avadanlıqlarından normal istifadə etmək mümkün olmur. Bildirilir ki, problemlə bağlı dəfələrlə aidiyyəti qurumların qaynar xəttinə müraciət edilsə də, indiyədək heç bir nəticə əldə olunmayıb.
Vətəndaşlar qeyd edirlər ki, bu problem təkcə bu ilə aid deyil, artıq 3-4 ildir davam edir və xüsusilə yay aylarında vəziyyət daha da ağırlaşır.
Sakinlər aidiyyəti qurumlardan problemin araşdırılmasını və ərazidə elektrik təchizatının normallaşdırılması üçün təxirəsalınmaz tədbirlərin görülməsini xahiş edirlər.
