Lənkəranda 3 nəfərin xəsarət alması ilə nəticələnən yol-nəqliyyat hadisəsi baş verib.
Apa.аz xəbər verir ki, hadisə Lənkəran şəhərinin "Qala Xiyabanı" deyilən ərazisində qeydə alınıb.
Belə ki, hərəkətdə olan "VAZ-2107" markalı minik avtomobili ilə "Chevrolet Cruze" markalı minik avtomobili toqquşub.
Toqquşma nəticəsində avtomobillərdən biri yol kənarındakı elektrik dirəyinə çırpılıb və dirəyi aşırıb. Sonra da yaxınlıqda olan marketin soyuducusunu sıradan çıxarıb.
Qəzada 3 nəfər, Lənkəran rayon sakinləri, 1970-ci il təvəllüdlü Mübariz Əsədov, 1992-ci il təvəllüdlü Vüsalə Əhmədli və 1979-cu il təvəllüdlü Aypara Ağayeva müxtəlif dərəcəli bədən xəsarətləri alaraq Lənkəran Rayon Mərkəzi Xəstəxanasının təcili yardım şöbəsinə hospitalizasiya olunublar.
Onlara zəruri tibbi xidmətlər göstərilib. Vəziyyətlərinə uyğun olaraq müalicələri müvafiq şöbədə davam etdirilir.
Faktla bağlı araşdırma aparılır.
