Lənkəranda baş vermiş ağır yol-nəqliyyat hadisəsi nəticəsində iki nəfər dünyasını dəyişib. Bu haqda məlumatı Cenublu.az bu gün, 9 avqust tarixində Report.az-a istinadən verir.
Hadisə rayonun Vel kəndində, məktəb yolunda qeydə alınıb. “VAZ-2107” markalı, 44-CF-979 dövlət qeydiyyat nişanlı avtomobilin idarəetmədən çıxaraq yol kənarındakı daş hasara çırpılması nəticəsində avtomobildə olan üç nəfər Səpnəkəran kənd sakini müxtəlif dərəcəli bədən xəsarətləri ilə Lənkəran Rayon Mərkəzi Xəstəxanasına çatdırılıb.
Onlardan ikisinin - 23 yaşlı Fariz Əliyev və 22 yaşlı Ruslan Hüseynzadənin həyatını xilas etmək mümkün olmayıb. 32 yaşlı Tərlan Rəhimovun isə vəziyyəti ağır qiymətləndirilir.
Meyitlər müayinə olunması üçün Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin Lənkəran rayon şöbəsinə təhvil verilib.
Faktla bağlı araşdırma aparılır.
