Lənkəran rayonunda yağan intensiv yağışlar çəltik sahələrinə ciddi zərər vurub.
Cenublu.az xəbər verir ki, təqribən 60 hektara yaxın çəltik sahəsi sel suları nəticəsində tamamilə yararsız vəziyyətə düşüb.
Rayonda çəltik yığımına təxminən bir ay əvvəl başlanılıb. Fermerlərin sözlərinə görə, sel suları sahələri biçin vaxtı basdığı üçün həm yığım prosesi ləngiyib, həm də sahələr dağılıb. Fermer-aqronom Möhtəmən Fərziyev bildirib ki, bu il sahələrdə “Belita” və el arasında “topa düyü” adlandırılan “Malisa” sortları əkilib. Yığımın əvvəlində 1 hektardan “Malisa”dan 4 ton, “Belita”dan isə 6–7 ton məhsul götürülürdü.
“Yağışlar başlayandan sonra vəziyyət tam dəyişdi. Sahələrimiz sığortalanıb və bu il sığorta şirkətindən real dəstək gözləyirik. Əks halda məhsul itkisi bazarda düyünün qiymətinə də təsir göstərə bilər. Keçən il 2,70 manata satılan düyü bu il 3 manatdan yuxarı ola bilər”, — deyə fermer qeyd edib.
Lənkəran Dövlət Aqrar İnkişaf Mərkəzinin Bitkiçilik sektorunun müdiri İlqar Həsənov bildirib ki, 2025-ci təsərrüfat ilində rayonda 780,2 hektar sahədə çəltik əkini aparılıb və bu günə qədər 350 hektara yaxın ərazidə biçin həyata keçirilib. Son yağışlar nəticəsində isə 60 hektar sahəyə ciddi zərər dəyib.
Yağış səbəbindən yetişmiş sünbüllər torpağa yatıb və uzun müddət suda qaldığından cücərərək yararsız vəziyyətə düşüb. Bu da kombaynların həmin sahələrdə biçin aparmasını mümkünsüz edib və fermerlərə ciddi ziyan vurub.
Fermerlər növbəti illər üçün texnika sayını artırmağı hədəfləyirlər. Onların sözlərinə görə, sentyabrın əvvəllərində texnika çatışmazlığı olmasa, məhsul vaxtında yığıla bilər və bu cür problemlər minimuma enər.
