Cəlilabad rayonunun Ağbulaq kəndinin yolları bərbad vəziyyətdədir. Bu haqda məlumatı Cenublu.az bu gün, 12 oktyabr tarixində Azertac-a istinadən verir.
Belə ki, kəndin sakinləri illərdir yol problemi ilə yaşayırlar. Sakinlərin sözlərinə görə, yol o qədər bərbad vəziyyətə düşüb ki, onlar 7 kilometr yolu qət etmək üçün həm xeyli vaxt itirirlər, həm də əlavə xərc çəkməli olurlar.
Sakinlər rayon mərkəzinə və digər yaşayış məntəqələrinə getmək üçün çala-çuxurlu yollardan istifadə etməli olurlar. Bu, həm vaxt itkisi, həm də avtomobillərin texniki baxımdan daha tez sıradan çıxmasına səbəb olur.
Məsələ ilə bağlı Cəlilabad Rayon İcra Hakimiyyəti başçısının kənd inzibati ərazi dairəsi üzrə nümayəndəsi Rövşən Mirzəyev bildirib ki, sakinlərin problemindən xəbərdardırlar: “Mövcud problemlə bağlı deyə bilərəm ki, həmin kəndə çəkilmiş yol uzun illərdir təmir olunmur. Yaxın gələcəkdə kəndlərarası yolun bərpasının investisiya proqramına daxil edilməklə yenidən qurulması nəzərdə tutulur”.
