Astara rayonunun Şəvqə kəndində yolun olmaması sakinləri narahat edir. Bu haqda məlumatı Cenublu.az bu gün, 27 sentyabr tarixində Real TV-yə istinadən verir.
Məsələ o qədər ciddidir ki, kənddə xəstə biri olduqda onu kənd sakinləri çiyinləri üstdə xəstəxanaya çatdırırlar, çünki kəndə təcili tibbi yardım maşını gələ bilmir.
Sakinlər bildiriblər ki, 300-dən çox sakinin yaşadığı kəndə əslində avtomobil yolu heç vaxt çəkilməyib. Sözügedən 2,5 km-lik yol 2012-ci ildə sakinlərin vəsaiti hesabına salınıb. Bu yol sakinləri əsas magistral yola, digər ərazilərə və ən əsası, təhsil ardınca gedən şagirdləri yaxınlıqdakı Pəlikəş kəndindəki məktəbə aparır. Lakin mövsümi yağışlar yolun bir hissəsinin uçmasına və bununla da hərəkətin məhdudlaşmasına səbəb olub.
Məsələ ilə bağlı Astara rayon İcra Hakimiyyətinin başçısının Pəlikəş kənd inzibati ərazi dairəsi üzrə nümayəndəsi Xaqani Xalıqov bildirib ki, Astara rayonunun dağlıq hissəsi olan Pəlikəş ərazisinin 13 kəndi var və ərazi çətin relyefə malikdir. Buna baxmayaraq, bütün kəndlərə avtomobil yolları çəkilib.
“Pəlikəş ərazisinin mərkəzindən Şəvqə kəndinə qədər 9 km-dir, bunun 6 km-i çınqıllı, 3 km-i isə torpaq yoldur. 3 kilometr torpaq yolda yağış və qar yağanda maşınların hərəkət etməsi üçün müəyyən problemlər yaranır. 2022-ci ilin avqust ayında torpaq yolun müəyyən hissəsi, yəni 800 metrdən çox hissəsi Astara RİH-nin başçısının göstərişi ilə genişləndirilib. Inşallah, işlər davam etdiriləcək. Yaxın gələcəkdə ərazi üzrə yol problemi həll olunacaq”, - deyə o bildirib.
