Ağdaş rayonunda baş verən ağır yol qəzası iki bacının ölümü ilə nəticələnib.
Cenublu.az xəbər verir ki, hadisə Əmirarx kəndi ərazisində qeydə alınıb. Hərəkətdə olan “Mercedes” markalı minik avtomobili yolu keçmək istəyən iki qadını vurub. Onlar aldıqları xəsarətlərdən hadisə yerində dünyalarını dəyişiblər.
Həlak olan bacılar — 1976-cı il təvəllüdlü Ramazanova Sədaqət və 1978-ci il təvəllüdlü Soltanova Elnarə Astara rayonunun Giləkəran kənd sakinləridir. Onlar həkim qəbuluna getmək üçün əvvəlcə Bakıya yollanıblar. Daha sonra həkimin Ağdaş rayonunda qəbul keçirdiyi məlum olub və bu səbəbdən oraya gediblər.
Qəza “Mercedes” və “KamAZ” markalı avtomobillərin iştirakı ilə yaranan vəziyyət zamanı baş verib. “Mercedes” avtomobili qəzadan yayınmaq üçün yolun qarşı tərəfinə çıxıb və həmin an piyadaları vurub.
Hər iki bacı doğulduqları Astara rayonunun Giləkəran kəndində dəfn edilib.
