Astara rayonunda narkotik vasitələrin qaçaqmalçıları saxlanılıb. Bu haqda bu gün, 10 avqust tarixində Cenublu.az APA.az-a istinadən xəbər verir.
Rayonun Qapıçıməhəllə kəndi ərazisində sərhəd naryadı şübhəli hərəkətlər edən şəxsləri müşahidə ediblər. “Mercedes-Benz” markalı 10-UD-091 dövlət nömrə nişanlı avtomobilin mühəndis-texniki çəpərinin yaxınlığında dayanması, avtomobildəki şəxslərdən birinin düşərək kolluqda gizlədilmış 1 ədəd bağlamanı götürməsi sərhəd naryadının diqqətini cəlb edib.
Sərhəd əməkdaşları avtomobildən düşən sərnişini, 54 yaşlı Ağdam rayon sakini Mamedov İlqar Boran oğlunu saxlayıblar. Avtomobili idarə edən şəxs ərazidən uzaqlaşıb. Yol Polisi əməkdaşlarının keçirdikləri əməliyyat nəticəsində sürücü, 42 yaşlı Xocavənd rayon sakini Aslanov Anar Yavər oğlu saxlanılıb.
Onların üzərinə keçirilən baxış zamanı təxmini çəkisi 6 kq-ya yaxın psixotrop tərkibli “metamfetamin” həbləri və 695 qr marixuanaya bənzər narkotik maddə aşkar olunaraq götürülüb.
