Astara rayonunda leysan yağışları torpaq sürüşməsinə gətirib çıxarıb.
Cenublu.az xəbər verir ki, yağıntılı hava şəraiti nəticəsində bölgədə çaylarda suyun səviyyəsi artıb, ucqar dağ kəndlərində sel suları yolları və körpülərə zərər vurub.
Rayonun Niləşə kəndində qeydə alınan torpaq sürüşməsi təxminən 100 metr ərazini əhatə edib və ətraf evlər üçün təhlükə yaradıb. Kənd sakini Günay Ruhşanovaya məxsus həyətyanı sahədə sitrus ağacları, həmçinin toyuq və cücələr torpaq altında qalıb.
Siyəkü kənd bələdiyyəsinin sədri Ramin Dədəyev bildirib ki, sürüşmə baş verən ərazi meşə təsərrüfatına aiddir və vətəndaşların müraciəti əsasında aidiyyəti qurumlara məlumat verilib:
“Asif Fətəliyevə məxsus həyətdə yamac yarılaraq sel suları evin yaxınlığında dayandı. Oradakı istinad divarları zədələnib, toyuqlar üçün tikilən hin dağılıb və evə də ziyan dəyib. Həmin torpaq sahəsi meşə təsərrüfatına aid olduğundan evin sənədləri mövcud deyil”.
Onun sözlərinə görə, dağlardan gələn sel suları qurumuş ağacların qol-budaqlarını və torpaq qatını gətirərək bəzi körpülərin və suötürücü boruların qarşısını kəsib. Hazırda həmin ərazilərdə təmizləmə işləri aparılır.
