Çəltikçilik ilə məşhur Astara rayonunda çəltik yığımına başlanılıb. Bu haqda bu gün, 6 sentyabr tarixində Cenublu.az AzTV-yə istinadən xəbər verir.
Rayonun Artupa, Səncərədi, Suparibağ, Kakalos, Ərçivan, Pensər və Şiyəkəran kəndlərində çəltik sahələri mövcuddur. Ümumilikdə 200 hektardan çox çəltik əkilib, bunun da 55 hektarı Artupa kəndinin payına düşür.
Fermer bildirir ki, builki məhsuldarlıq ötən ilə nisbətən daha çoxdur. Keçən il ilə müqayisədə fermer 3 hektardan çox sahədə məhsul əldə edib.
Hazırda sahələrdə biçin işləri görülür. Əraziyə texnikalar cəlb olunub. Gün ərzində 1.5 hektar sahə biçilir. Çəltiyin məhsuldarlığı hər hektar üzrə təxminən 42 sentnerdir. Amma fermerlər deyirlər ki, əgər sertifikatlı toxum səpsələr, daha çox məhsul götürə bilərlər.
Hazırda biçilən çəltiklər Artupada fəaliyyət göstərən 2 emal müəssisəsində üyüdülür. Çəltiyin üyüdülməsindən sonra əldə edilən düyü elə dəyirmanda da satılır. Müxtəlif bölgələrdən bura keyfiyyətli və ekolojı cəhətdən təmiz düyü almağa gəlirlər. Hətta İrandan və Türkiyədən olan turistlər də Astara düyüsünə maraq göstərirlər.
Çəltik yığımı sentyabrın ortalarınadək davam edəcək.
