Azərbaycan Dövlət Kukla Teatrının aktyoru Aslan Fətullayev 7 yaşından səhnədədir.
Aslan Miri oğlu Fətullayev 1956-cı il oktyabrın 20-də Lerik rayonunun Çayrud kəndində anadan olub. A.Fətullayev 1974-1976-cı illərdə Bakı Kitabxanaçılıq Texnikumunun, 1976-1982-ci illərdə Azərbaycan Dövlət İncəsənət İnstitutunun mədəni–maarif fakültələrində təhsil alıb. 1975-1978-ci illərdə A.Şaiq adına Bakı Kukla Teatrında keçirilən Yeni il şənliklərində əsas aparıcı aktyor kimi çıxış edib.
1975-ci ildə "Canlı şahid" televiziya tamaşasındakı Şani obrazı ilə 19 yaşında ikən televiziyanın qızıl fonduna düşüb. Televiziyanın "Səhər görüşləri", "Gecə kanalı", "Komediyalar aləminə səyahət", "45 dəqiqə" kimi populyar verilişlərində yaddaqalan obrazlar yaradıb.
A.Fətullayev "Oğlan və maral" filmində fotoreportyor, "Mikrorayonda cin"də kiçik cin, "Papaq"da papaqçının dostu, "Qorxma, mən səninləyəm"də İvan Spirodonoviç, "Qətl günü"ndə zindanban, "Mozalan"ın çəkdiyi "Kapitan" satirik kinojurnalında basketbol komandasının kapitanı kimi obrazlar yaradıb, "Ağ gəmi", "Stepanın yadigarı", "Baş tutmayan ezamiyyət" və s. filmləri dublyaj edib.
"Anacan"da Qulu, "Təxribatçılar"da polis generalı, "Mən sənin dayınam"da dramaturq, "Varlı qadın"da Pəhləvan Zərlinski, "Mesenat"da H.Z.Tağıyevin xidmətçisi və s. teatr tamaşalarındakı yaratdığı obrazlar aktyorun rəngarəng yaradıcılıq palitrasının nümunələridir.
Azərbaycan televiziyasının "Ordan - burdan", "Məzəli əhvalatlar", "Bir bazar günü" kimi verilişlərdə yaddaqalan obrazlar yaradıb.
2008-ci ildən Abdulla Şaiq adına Azərbaycan Dövlət Kukla Teatrında çalışır.
