Vətən müharibəsinin gənc qəhrəmanlarından biri də Samir Allahverdiyevdir. O, 7 iyun 2001-ci ildə Lənkəran şəhərində dünyaya göz açıb. Qəhrəmanımız ailənin sonuncu övladı idi. O, futbolçu olmaq, vətənimizi xaricdə layiqincə təmsil etmək arzusunda idi.
2019-cu ildə əsgərliyə yollanan Samir nümunəvi xidmətinə görə qısa müddətdə manqa komandiri olur. 27 sentyabr 2020-ci ildə başlanan Vətən müharibəsində döyüşlərə qatılır. Füzuli, Cəbrayıl və Qubadlının azadlığı uğrunda gedən döyüşlərdə düşmənə qarşı qəhrəmancasına vuruşur.
Samir 22 oktyabr Qubadlının azadlığı uğrunda gedən döyüşlərdə yaralansa da, döyüş meydanını tərk etmir, sonadək vuruşur. Bu, onun son döyüşü olur. Samir Allahverdiyev ölümündən sonra “Vətən uğrunda”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
Samir ailənin kiçik oğlu idi. Onun ailəsi onunla hər zaman fəxr edəcək, çünki torpaqlarımızın azad olunmasında Allahverdiyev ailəsinin də payı var.
