Lənkəran Şəhər İcra Hakimiyyətinin başçısı Taleh Qaraşovun qardaşı oğlu Azay Qaraşov ilkin ifadəsində atası Azər Qaraşovu öldürdüyünü etiraf edib. Bu haqda məlumatı Cenublu.az bu gün, 28 iyul tarixində Qafqazinfo-ya istinadən verir.
24 yaşlı Azay Qaraşov bildirib ki, atası Azər Qaraşov evdə anasına mütəmadi şiddət göstərirdi. Bu səbəbdən o, atasını qətlə yetirmək qərarına gəlib.
Hadisə yerinin ilkin müayinəsi zamanı Azər Qaraşovun güllə xəsarətlərindən öldüyü otağın tavanında güllə izləri aşkar edilib. Müəyyən olunub ki, hadisə vaxtı ata və oğulun olduğu otağa ilk olaraq Azayın bacısı daxil olub. O, qardaşının atasını güllələdiyini görərək onun əlindəki beşatılan tüfəngi almağa çalışıb. Bu zaman yenidən atəş açılıb və evin tavanına dəyib.
Baş vermiş hadisə ilə bağlı aparılan araşdırmalar zamanı evin tavanındakı güllə izləri, həmçinin digər şübhəli məqamlar kriminalistlərin diqqətini cəlb edib. Bundan sonra davam etdirilən istintaq tədbirləri ilə cinayətin üstünün qısa müddətdə açılması təmin edilib.
Azay Qaraşov barəsində Cinayət Məcəlləsinin 120.1-ci (Qəsdən adam öldürmə) maddəsi ilə iş başlanılıb. İstintaq tədbirləri davam etdirilir.
