Lənkəran Şəhər İcra Hakimiyyətinin başçısı Taleh Qaraşovun qardaşı Azər Qaraşovun 18 yaşlı oğlu Azay Qaraşov tərəfindən qətlə yetirilməsinin səbəbi məlum olub. Bu haqda məlumatı Cenublu.az bu gün, 28 iyul tarixində Bizim.media-ya istinadən verir.
Mərhumun ailə üzvləri bildiriblər ki, hadisə ailə münaqişəsi zəminində baş verib. Belə ki, mərhum Azər Qaraşov evdə həyat yoldaşı ilə mübahisə edib. Bu zaman bunu görən Azay Qaraşov evdəki odlu silahla atasına bir neçə dəfə atəş açıb. Azər Qaraşov aldığı ağır xəsarətlərdən elə hadisə yerindəcə dünyasını dəyişib.
Baş Prokurorluğun mətbuat xidmətindən bildirilib ki, Kürdəmir rayon sakini Azər Qaraşovun iyulun 26-da odlu silahdan açılan atəş nəticəsində ölməsi faktı ilə bağlı İstintaq İdarəsində cinayət işi başlanılıb.
Qeyd edək ki, əvvəlcə mediada Azər Qaraşovun qardaşının intihar etdiyi bildirilsə də, Lənkəran şəhər İcra Hakimiyyətindən bu məsələ təkzib olunmuşdu və Taleh Qaraşovun qardaşının ehtiyatsızlıqdan özünə güllə açdığı bildirilmişdi.
