Lənkəran şəhər İcra Hakimiyyətinin başçısı Taleh Qaraşovun qardaşı Azər Qaraşov özünü güllələyib. Bu haqda məlumatı Cenublu.az bu gün, 27 iyul tarixində verir.
Hadisə onun yaşadığı Kürdəmir rayonunun Pirəköcə kəndində qeydə alınıb. 48 yaşlı Azər Qaraşov hadisə yerində vəfat edib.
Baş Prokurorluğun mətbuat xidmətindən bildirilib ki, faktla bağlı Kürdəmir rayon prokurorluğunda araşdırma aparılır.
Məsələ ilə bağlı Lənkəran rayon İcra Hakimiyyətindən bildirilib ki, Azər Qaraşov intihar etməyib, silahla ehtiyatsız davranması nəticəsində açılan atəşdən həyatını itirib.
Qeyd edək ki, ləğv edilən Əmlak Məsələləri Dövlət Komitəsinin rayon şöbəsində və bir sıra dövlət qurumlarında çalışmış Azər Qaraşov hazırda işsiz idi. O, üç uşaq atası idi.
