Bu gün Azərbaycan Silahlı Qüvvələrinin leytenantı, Vətən müharibəsi şəhidi Emil Qurbanovun mövlud günüdür.
Emil Qurbanov 1980-ci ildə avqustun 25-i Lənkəranda anadan olub. Lənkəran şəhər A.Məhərrəmov adına 7 nömrəli tam orta məktəbdə təhsil alıb, daha sonra isə Lənkəran Dövlət Universitetinin Fiziki tərbiyə və gənclərin çağırışaqədərki hazırlığı fakültəsində oxuyub.
Həqiqi hərbi xidmətdə olan Emil Qurbanov leytenant rütbəsini alıb. 2003-cü ilin oktyabrında Tərtər rayonunun "N" saylı hərbi hissəsində tağım komandiri kimi xidmətə başlayıb. 2005-ci ildə "Zirvə" idman kompleksində məşqçi-müəllim kimi işləməyə başlayıb, idman müəllimi kimi müxtəlif yarışlarda iştirak edib. Daha sonra o, Lənkəran Şəhər Uşaq-Gənclər İdman Məktəbinə məşqçi-müəllim təyin olunub. 2012-ci ildə Lənkəran şəhər A.Məhərrəmov adına 7 nömrəli tam orta məktəbdə gənclərin çağırışaqədərki hazırlığı müəllimi kimi işləməyə başlayıb.
Vətən müharibəsi zamanı tağım komandiri kimi Füzuli, Xocavənd və Qubadlı uğrunda gedən döyüşlərdə iştirak edib. 29 oktyabr 2020-ci ildə Qubadlının düşməndən azad olunması uğrunda gedən döyüşlərdə şəhid olub. 6 noyabr 2020-ci ildə Lənkəranda dəfn olunub.
Ölümündən sonra "Vətən uğrunda", "Cəbrayılın azad olunmasına görə", "Qubadlının azad olunmasına görə" medalları və "Azərbaycan Bayrağı" ordeni ilə təltif edilib.
