Salyan rayonunun Sarvan kəndində fərdi yaşayış evində yanğın baş verib.
Cenublu.az xəbər verir ki, hadisə Rəmziyyə Mehdiyevaya məxsus yaşayış evində qeydə alınıb.
Məlumata görə, yanğın baş verən zaman ev sahibi yaxın qohumunun yas mərasimində olub. Evə qayıdarkən yaşayış evinin damından tüstü çıxdığını görən Rəmziyyə Mehdiyeva dərhal yanğınsöndürmə xidmətinə məlumat verib.
Qısa müddət ərzində hadisə yerinə Salyan Rayon Yanğından Mühafizə Hissəsinin əməkdaşları cəlb olunub. Yanğının daha geniş əraziyə yayılmasının qarşısı alınıb və alov söndürülüb.
Hadisə nəticəsində evin dam örtüyünə və digər hissələrinə ziyan dəyib. Yanğının hansı səbəbdən baş verdiyi hələlik məlum deyil.
Hazırda hadisə ilə bağlı araşdırma aparılır.
