Rəşt-Astara dəmir yolu xəttinin tikintisinin başa çatdırılması 2028-ci ilədək planlaşdırılır. Bu haqda məlumatı Cenublu.az bu gün, 29 iyul tarixində Apa.az-a istinadən verir.
Rusiya Federasiyası Nəqliyyat Nazirliyinin rəhbəri Vitaliy Savelyev bildirib ki, Şimal-Cənub beynəlxalq nəqliyyat dəhlizinin qərb marşrutunun inkişafı çərçivəsində 2023-cü ilin mayında hökumətlərarası saziş imzalanıb ki, bu da İran ərazisində Rəşt-Astara dəmir yolu xəttinin çatışmayan hissəsinin tikintisi ilə bağlı təxminən 20 illik müzakirələrin nəticəsidir. Onun sözlərinə görə, 2028-ci ilə qədər tikintinin tam yerinə yetirilməsi gözlənilir.
Vitaliy Savelyev qeyd edib ki, “Rusiya Dəmir Yolları” holdinqinin məqsədi 2023-cü ildə Şimal-Cənub beynəlxalq nəqliyyat dəhlizi vasitəsilə 1 milyondan çox konteyner daşımaqdır.
Bildirilib ki, mayın 17-də Rusiya və İran Fars körfəzi limanlarına birbaşa keçidi təmin edəcək. Şimal-Cənub layihəsi çərçivəsində Rəşt-Astara yolunun 160 kilometrlik hissəsinin birgə tikintisinə dair saziş imzalanıb. Layihənin ümumi dəyəri 1,6 milyard avrodur.
Xatırladaq ki, hazırda Azərbaycanın tranzit-logistika potensialının gücləndirilməsində önəmli rol oynayan Şimal-Cənub beynəlxalq nəqliyyat dəhlizinin reallaşdırılması istiqamətində görülən tədbirlər çərçivəsində Sumqayıt-Yalama dəmir yolu yenidən qurulur. Yenidənqurma işlərinin başa çatdırılması 2024-cü ilin sonuna planlaşdırılıb.
