Məktəbliyə zorakılıq etməkdə ittiham olunan Lənkəran İcra Hakimiyyəti başçısının sabiq müavini Rasilə Arifqızının məhkəməsi sona çatıb. Bu haqda məlumatı Cenublu.az bu gün, 10 oktyabr tarixində Apa.az-a istinadən verib.
Lənkəran Rayon Məhkəməsində, hakim Rəşad Məmmədovun sədrliyi ilə keçirilən iclasda sabiq məmura hökm oxunub. Hökmə əsasən o, 4 min manat məbləğində cərimə olunub.
Məhkəmə hökm qəbul edərkən tərəflər arasında barışığın əldə olunmasını, heç bir şikayət və tələbin olmamasını yumşaldıcı hal kimi qeydə alıb. İttiham olunan sabiq icra başçısının müavini son sözündə məsələnin bu qədər böyüməsindən peşman olduğunu deyib.
Qeyd edək ki, bir müddət öncə Rasilə Arifqızı Lənkəran şəhər V.Əliyev adına 4 nömrəli humanitar təmayüllü məktəb-liseyinin 9-cu sinif şagirdinə qarşı fiziki zorakılıq hərəkətləri etdiyinə görə vəzifəsindən azad olunub. Ona Cinayət Məcəlləsinin 309.1-ci (vəzifə səlahiyyətlərini aşma) maddəsi ilə ittiham verilib.
