Rüstəm İmamzadə 1998-ci ildə Lənkəran şəhərində anadan olub. 9 yaşından ağır atletika ilə məşğul olmağa başlayır. 4 ay məşğul olduqdan sonra artıq yarışlara qatılır. İlk yarışında təkanqaldırmada 18 kq, birdənqaldırmada isə 15 kq qaldıraraq çempion olur.11 yaşında yığma komandaya cəlb olunur. İlk beynəlxalq yarışı Belarusda baş tutur. O, yarışda zədəli olduğu üçün 3-cü yerin sahibi olur. 14 yaşı olarkən Dünya çempionatında qolundan zədə alır. Məşqçi-müəllimləri və həkimlər ona bir müddət idmandan uzaqlaşmağı bildirsələr də, o gizlincə 2013-cü ilin sentyabrında baş tutacaq Avropa çempionatına hazırlaşır. Orada o, 3 qızıl medal qazanır, 3 rekorda imza atır və qitənin ən güclü idmançısı seçilir.
Sonuncu qatıldığı yarışda 148 kiloqram ağırlığı qaldıranda qolu zədələnir və ağırlıq belinə düşür:“Artıq doqquz ilə yaxındır ki, yeriyə bilmirəm. Mənim ən çox qaldırdığım ağırlıq 155 kq olub. Ancaq təəssüf ki, zədəni 148 kq ağırlığı qaldırarkən aldım. Məni zədələnməyimdən daha çox, o çəkini qaldıra bilməməyim sarsıtdı. Həmin an şiddətli ağrı hiss etsəm də, düşünmədim ki, yeriyə bilməyəcəyəm. Xəstəxanada gözümü açanda artıq ayağımı hiss etmirdim. Həkimlər dedilər ki, əgər ilk altı ayda ayaqlarında hərəkət olarsa, yerimək şansın çoxdur. Mən o anda sadəcə sağalıb yenidən idmana qayıtmaq barədə düşünürdüm. Bu, indi də belədir. İnanıram ki, ayaqlarım sağalacaq və mən yenidən idmana qayıdacağam”.
25 yaşlı Rüstəm İmamzadəni hərbi xidmətə yararsız kimi yazmaq istəsələr də, o bununla razılaşmır. Çünki inanır ki, yenidən sağalıb idmana qayıda və hərbi xidmətə yollana biləcək. Onun ən böyük arzusu Olimpiya çempionu medalını qazanmaqdır.Qeyd edək ki, bu yaxınlarda Prezident İlham Əliyev tərəfindən ona ev bağışlanıb.
