Astara rayon İcra Hakimiyyətinin başçısı Qəzənfər Ağayev növbəti səyyar qəbul-görüşünü Siyaku kənd inzibati ərazi dairəsi üzrə nümayəndəliyin Vaqo kəndində keçirib. Bu haqda məlumatı Cenublu.az bu gün, 4 aprel tarixində verir.
Görüşdə rayonun inzibati orqanlarının, idarə və müəssisələrinin rəhbərləri iştirak ediblər.
İcra başçısı kənddə son illər görülən işlər haqda danışıb. Belə ki, son dövr ərzində Vaqo kəndində yeni məktəb binası tikilib, yollar asfaltlanıb, kəndə təbii qaz verilib, çayda sahilbərkitmə işləri aparılıb, sel sularının tamamilə dağıtdığı iki avtomobil körpüsü yenidən tikilib. Hazırda Siyaku kənd inzibati ərazi dairəsinə daxil olan bütün kəndlərin elektrik şəbəkəsi tamamilə yenilənir, sürətli internet şəbəkəsi çəkilir.
Daha sonra görüşdə iştirak edən sakinlərin arzu və təklifləri dinlənilib, məsələlərin həlli ilə əlaqədar aidiyyəti üzrə tapşırıqlar verilib.
