Astara rayon İcra Hakimiyyətinin başçısı Qəzənfər Ağayev Şuvi inzibati ərazi dairəsi üzrə nümayəndəliyinin Səlivə kəndində əhali ilə səyyar qəbul-görüş keçirib. Bu haqda məlumatı Cenublu.az bu gün, 9 aprel tarixində verir.
Görüşdə rayonun idarə və müəssisələrinin rəhbərləri iştirak ediblər. İcra başçısı qeyd edib ki, son illər kənddə çoxlu işlər görülüb:
“Yollar bərbad vəziyyətdə olduğundan əvvəllər bu kəndə çətinliklə gələrdik. Müraciətiniz əsasında dəstəyimizlə kənd ara yollarına çınqıl döşənib, elektrik xətt təsərrüfatında təmir işləri aparılaraq elektrik enerjisinin fasiləsiz verilişi təmin olunub. Ən böyük problemlərdən biri olan, uzun müddət hər birimizi narahat edən kəndə qaz çəkilişi məsələsi, nəhayət ki, həllini tapıb. Qaz xəttinin çəkilişi tam başa çatdırılıb, yaxın günlərdə açılışı olacaq. Bu, cənab Prezidentin siz sakinlərə ən böyük hədiyyəsidir. Bu kəndlə yanaşı, hazırda Vənəşikəş, Noyabud və Burzubənd kəndlərinə də təbii qaz xəttinin çəkilməsinə başlanılıb”.
Kənddə böyük problemlərin qalmadığını qeyd edən icra başçısı sakinlərə respublikada ilk dəfə bu ərazidə yaradılan avokado və digər meyvə bağlarında çalışmaqla yanaşı, təcrübə toplayaraq öz təsərrüfatlarında da bu ekzotik meyvə sortlarından yetişdirməyi tövsiyə edib.
Tədbirdə çıxış edən sakinlər görülən işlərlə yanaşı, kənddə əlavə elektrik transformatorunun qoyulmasına, məişət tullantılarının yığılmasından ötrü sosial işçinin ayrılmasına, maddi imkanı olmadığına görə fərdi yaşayış evinə qaz xəttinin çəkilməsinə köməklik göstərilməsini xahiş ediblər.
Səyyar qəbul-görüşdə sakinlərin arzu və təklifləri dinlənilib, qaldırılan problemlərin həlli ilə əlaqədar aidiyyəti üzrə tapşırıqlar verilib.
