Astara rayon icra hakimiyyətinin başçısı Qəzənfər Ağayev növbəti səyyar qəbul-görüşü Kijəbə qəsəbəsinin Lovayın yaşayış massivində keçirib. Bu haqda məlumatı Cenublu.az bu gün, 10 aprel tarixində verir.
Görüşdə rayonun inzibati orqanlarının, idarə, müəssisə və təşkilatlarının rəhbərləri iştirak ediblər.
İcra başçısı kənd Lovayında son zamanlar görülən işlər haqda danışıb.
Belə ki, kəndin əsas avtomobil yolu asfaltlanıb, qazlaşma, elektrik enerjisi ilə fasiləsiz təminat və digər vacib məsələlər öz həllini tapıb.
“Buranın camaatı zəhmətsevər, torpağa bağlı insanlardır. Bilirəm ki, burada sitrus bağçılığı ilə yanaşı, xeyli insan calaq, dekorativ bitkilərin yetişdirilməsi ilə məşğuldur və rayonumuzla yanaşı, respublikanın hər yerinə yetişdirdikləri tingləri sata bilirlər”.
İcra başçısı qeyd edib ki, qonşu Səlivə-Sərək ərazisində 120 hektarda yeni bağ salınır:
“Keçən həftə orada 40 hektarda salınmış avokado bağında olmuşam. Bu ekzotik meyvə bağı respublikamızda bir ilkdir. Onun yetişdirilməsini də öyrənmək və yaymaq lazımdır. Bununla yaxşı gəlir əldə edə bilərsiniz”.
İcra başçısı kəndin torpaqlarının subtropik və sitrus bitkiçiliyi üçün olduqca əlverşli olduğunu vurğulayaraq boş qalan hər qarış torpağın əkilməsinin vacibliyini, bunun insanların ailə büdcəsinə böyük səmərə verəcəyini diqqətə çatdırıb.
Sakinlər görülən işlər üçün minnətdarlıq bildirərək, həmçinin 800 metrə yaxın avtomobil yolunun asfaltlanmasına, elektrik xətt təsərrüfatının yenilənməsinə, Lovayın kənd tam orta məktəbi üçün yeni binanın tikilməsinə, məhəllələrindən keçən qaz borusunun təmir edilməsinə və qaz xəttinin çəkilməsinə, avtomobil körpüsünün təmirinə köməklik göstərilməsini xahiş ediblər.
İcra başçısı görüş zamanı qaldırılan müəyyən məsələlərin həlli ilə əlaqədar aidiyyəti üzrə tapşırıqlar verib, digər məsələlərin həlli barədə müzakirələr apararaq müvafiq qərarların qəbul ediləcəyini bildirib.
