Astara rayon icra hakimiyyətinin başçısı Qəzənfər Ağayev Şuvi kənd inzibati ərazi dairəsi üzrə nümayəndəliyinin Deqadi kəndində əhali ilə səyyar qəbul-görüş keçirib. Bu haqda məlumatı Cenublu.az bu gün, 26 iyul tarixində verir.
Görüşdə rayonun inzibati orqanlarının, idarə və müəssisələrinin rəhbərləri iştirak ediblər. İcra başçısı əvvəlcə kənddə görülən işlər haqda danışıb; kəndə asfalt yol çəkilib, Deqadi kənd ümumi orta məktəbi əsaslı təmir olunub, məktəbə əlavə korpus tikilib, yüksəkgərginlikli elektrik xətti məktəbin həyətindən kənarlaşdırılıb, xətt təsərrüfatında cari təmir işləri aparılıb, kənd qazla təmin olunub.
Səyyar qəbulda iştirak edənlər görülən işlərlə yanaşı, kəndə əlavə telefon nömrələrinin verilməsi və internet şəbəkəsinin genişləndirilməsi, qəzalı vəziyyətdə olan elektrik dirəklərinin dəyişdirilməsi və yeni ayırıcı yağ açarının quraşdırılması, odun yanacağının tədarük edilməsindən ötrü icazənin verilməsi, evləri Deqadi kəndində yerləşən Ojakəran kənd qeydiyyatında olan vətəndaşların evlərinə qaz xəttinin çəkilməsi barədə təkliflər veriblər.
İcra başçısı qaldırılan bəzi problemlərin həlli ilə əlaqədar aidiyyəti üzrə tapşırıqlar verib, digərlərinin həlli istiqamətində tədbirlərin müəyyənləşdiriləcəyini bildirib.
