Astara rayon İcra Hakimiyyətinin başçısı Qəzənfər Ağayev Səncərədi kənd inzibati ərazi dairəsi üzrə nümayəndəliyinin Artupa kəndində sakinlərlə səyyar qəbul və görüş keçirib. Bu haqda məlumatı Cenublu.az bu gün, 30 mart tarixində verir.
Görüşdə rayonun inzibati orqanlarının, idarə, müəssisə və təşkilatlarının rəhbərləri iştirak ediblər.
İcra başçısı nümayəndəliyin kəndlərində sakinlərlə dəfələrlə görüşlərin keçirildiyini bildirib. Bu görüşlərin həmişə səmərəli olduğunu, qaldırılan problemlərin həlli üçün aidiyyəti qurumlarla birgə vaxtında tədbirlər görüldüyünü diqqətə çatdırıb. O, son illər aparılan quruculuq, abadlıq işlərini birgə fəaliyyətin nəticəsi kimi izah edərək bunların davamlı olacağını bildirib.
Rayonun xidmət və təşkilatlarının cari ildə ərazidəki fəaliyyəti barədə qısa hesabatları dinlənilib.
Sakinlər öz növbələrində çəltik əkini üçün toxum verilməsinə, pay torpaq sahələri ilə bağlı uyğunsuzluqların aradan qaldırılması üçün tədbirlərin görülməsinə, məişət tullantıları üçün qutuların qoyulmasına, məişət tullantıları poliqonunun ərazisinin hasarlanmasına, torpaq sahəsinin Dövlət aktında adında səhv olduğu üçün əkinə görə subsidiya verilmədiyinə görə köməklik göstərilməsini xahiş ediblər.
İcra başçısı qaldırılan bəzi məsələlərin həlli ilə əlaqədar idarə, müəssisə rəhbərlərinə tapşırıqlar verib, vaxt tələb edən problemlərin həllini diqqətdə saxlayacağını bildirib.
