Lənkəranda yetkinlik yaşına çatmayan qızının polis tərəfindən zorlandığını iddia edən qadın məhkəməyə verilib. Bu haqda məlumatı Cenublu.az bu gün, 9 avqust tarixində Qafqazinfo.az-a istinadən verir.
Belə ki, Osaküçə kənd sakini Vüsalə Əliyeva mətbuatda çıxış edərək yetkinlik yaşına çatmayan qızının Lənkəran RŞPİ-nin yetkinlik yaşına çatmayanlarla profilaktiki işin təşkili üzrə inspektoru Orxan Şahmarov tərəfindən bir neçə dəfə cinsi təcavüzə məruz qaldığını iddia edib. Faktla bağlı polis barəsində Cinayət Məcəlləsinin 152.1-ci (16 yaşına çatmayan şəxslə cinsi əlaqədə olma) maddəsi ilə cinayət işi açılıb. O.Şahmarov isə bundan sonra Lənkərandakı vəzifəsindən azad edilərək başqa bir rayona eyni vəzifəyə göndərilib.
Daha sonra O.Şahmarov Vüsalə Əliyeva barəsində məhkəməyə müraciət edib. Cinayət Məcəlləsinin 147 və 148-ci (təhqir və böhtan) maddələri ilə qadına hökm elan edilib. Hökmə əsasən, V.Əliyeva CM-in 148-ci (böhtan) maddəsi ilə təqsirli bilinib və ona 360 saat ictimai iş cəzası verilib. 147-ci, yəni təhqir maddəsi ilə bağlı iddia isə təmin edilməyib və bu maddə ilə V.Əliyevaya bəraət verilib.
