Bu gün Azərbaycan Respublikasının Prezidenti yanında Dövlət İdarəçilik Akademiyasının Tarix kafedrasının professoru, Əməkdar müəllim, tarix elmləri doktoru, Azərbaycan Yazıçılar Birliyinin üzvü Musa Quluzadənin anım günüdür.
Musa Nizam oğlu Quluzadə 20 may 1939-cu ildə Masallı rayonunun Xıl kəndində anadan olub. Orta məktəbin 7-ci sinfini əla şəhadətnamə ilə bitirdikdən sonra Lənkəran Kənd Təsərrüfatı Texnikumunda, daha sonra Azərbaycan Dövlət Universitetinin İqtisadiyyat fakültəsində təhsil alıb.
Təhsilini başa vurduqdan sonra bir müddət partiya orqanlarında müxtəlif vəzifələrdə çalışıb, daha sonra həmin dövrün sayılıb-seçilən müəssisələrindən olan Lenin muzeyində elmi işçi kimi fəaliyyətə başlayıb, sonradan muzeyin elmi işlər üzrə direktor müavini olub.
1991-ci ildən Prezident yanında Dövlət İdarəçilik Akademiyasının Tarix kafedrasında dosent kimi fəaliyyətə başlayıb. 1984-cü ildən Azərbaycan Yazıçılar İttifaqının üzvü olan Musa Quluzadə 12-dən çox bədii kitabın müəllifidir. 22 aprel 2014-cü ildə Azərbaycan Respublikasının Prezidenti İlham Əliyev tərəfindən "Əməkdar Müəllim" fəxri adına layiq görülüb. 150-dən artıq elmi və publisistik məqalənin müəllifidir.
Musa Quluzadə 2023-cü ilin 13 mart tarixində vəfat edib və doğulduğu Xıl kəndində torpağa tapşırılıb.
