Əslən Masallıdan olan azərbaycanlı iş adamı Mübariz Mənsimova aid “Palmali” Şirkətlər Qrupu zəlzələdən zərər çəkmiş Malatya şəhərində konteynerlər quraşdıracaq. Bu haqda məlumatı Cenublu.az bu gün, 26 iyul tarixində “Palmali” şirkətinin mətbuat katibi Fidan Quliyevaya istinadən verir.
Mətbuat katibinin sözlərinə görə, "Yeşil yurt" ərazisində 100-ə yaxın konteyner quraşdırılacaq. O qeyd edib ki, hal-hazırda əməkdaşlar artıq ərazidədilər:
“Gəlməyimizdə məqsəd "konteyner kent" qurmaqdır. "Palmali" şirkətinin əməkdaşları bura səfərbər olunublar. Malatyada səhərimizi yüngül yeraltı təkanlarla açdıq. Zəlzələ 3,4 bal gücündə idi. Amma insanlar arasında heç bir təşviş olmadı. Lakin insanların üzündə bir narahatlıq hissi hələ də var. Elə bu gün anladıq ki, burada istər konteynerlərə, istərsə də çadırlara böyük ehtiyac var”.
