Əslən Masallıdan olan və “Kirvə Vüsal” adı ilə tanınan Vüsal Bayramov Bakıda ikinci həyat yoldaşını qətlə yetirib. Bu haqda məlumatı Cenublu.az bu gün, 16 sentyabr tarixində Qafqazinfo.az-a istinadən verir.
Hadisə 2 sentyabr saat 23 radələrində paytaxtın Nizami rayonu, M.Şərifli küçəsində baş verib. 27 yaşlı Ayşə Bayramova həyat yoldaşı, 33 yaşlı Vüsal Bayramovun hücumuna məruz qalıb. Çoxsaylı bıçaq zərbələrindən ağır yaralanan Ayşə qanitirmədən hadisə yerində vəfat edib.
Ayşə və Vüsal Bayramovların 5 illik evlilikdən bir oğulları olub. Ayşə ata-anasını erkən yaşda itirib və nənəsinin himayəsində böyüyüb. Hadisə də qadın nənəsinə baş çəkərkən qeydə alınıb.
Bildirilir ki, Ayşə Bayramova iş qadını kimi tanınıb. O, müxtəlif vaxtlarda paytaxtda yerləşən bir neçə geyim mağazasının sahibi olub.
Faktla bağlı Nizami Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. Vüsal Bayramov şübhəli şəxs qismində tutularaq istintaqa cəlb edilib. İş üzrə istintaq davam edir.
