Masallıda 42 yaşlı şəxs mübahisə zamanı anasına xəsarət yetirib. Bu haqda məlumatı Cenublu.az bu gün, 12 aprel tarixində Oxu.az-a istinadən verir.
Hadisə Banbaşı kəndində baş verib.
Belə ki, fərdi yaşayış evinin həyətində oğulla ana arasında sonuncunun övladının spirtli içki içməsinə etiraz etməsi ilə bağlı mübahisə yaranıb. Dava zamanı oğul anasını baş nahiyəsindən qəsdən əl ilə vurub. Nəticədə yerə yıxılan qadın müxtəlif dərəcəli bədən xəsarətləri alıb.
Hadisəni törədən şəxsin barəsində Cinayət Məcəlləsinin 128-ci maddəsi ilə ittiham elan olunub. O, elan olunmuş ittiham üzrə özünü təqsirli bilib və peşman olduğunu bildirib. Bu cinayət işinə rayon Məhkəməsində baxılıb.
Təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alaraq, cinayət təqibinə xitam verilib. O, cinayət məsuliyyətindən azad edilib.
