Q.İsmayılov adına Masallı rayonu Şərəfə kənd tam orta məktəbində “Məktəbəqədər təhsil” layihəsinin açılışı həyata keçirilib. Bu haqda bu gün, 24 aprel tarixində Cenublu.az xəbər verir.
Tədbirdə layihənin rəhbəri Rafət Şirəliyev qeyd edib ki, “Məktəbəqədər təhsil” layihəsi 6 aylıq proqram fəaliyyəti ilə Şərəfə kəndində yaşayan 3-5 yaşlı 20 nəfər azyaşlı uşağı əhatə edəcək.
Daha sonra RİH başçısı aparatının İctimai-siyasi və humanitar məsələlər şöbəsinin baş məsləhətçisi Əlimərdan Abdullayev, Lənkəran–Astara Regional Təhsil İdarəsinin Masallı rayon sektorunun aparıcı məsləhətçisi Azər Eyvazov, RİHB-nin Şərəfə kənd İƏD üzrə nümayəndəsi Rəşad Dadaşov, Şərəfə kənd tam orta məktəbinin direktoru Gülcan Kərimova və digər qonaqlar çıxış edərək layihə ilə bağlı ətraflı məlumatlar veriblər.
Tədbir çərçivəsində azyaşlı uşaqlar üçün formalaşdırılan otaqla tanışlıq həyata keçirilib, məktəbəqədər təlim prosesi yaxından izlənilib.
Layihənin məqsədi həm azyaşlı uşaqların, həm də məktəblərdə və kəndlərdə təhsil səviyyəsinin yüksəlməsidir.
“Məktəbəqədər təhsil” layihəsi Elm və Təhsil Nazirliyinin “Alternativ məktəbəqədər təhsil xidmətlərinin təşkili” pilot qrant proqramının qalibidir.
