Masallı rayon Mərkəzi Kitabxanasında Novruz bayramı ilə əlaqədar “Elimizə Novruz gəlir” adlı tədbir keçirilib. Bu haqda məlumatı Cenublu.az bu gün, 19 mart tarixində verir.
Kitabxananın direktor əvəzi Zamin Məmmədov xalqımızın gözəl bayramı olan Novruz münasibətilə tədbir iştirakçılarını təbrik edib. O, Novruz bayramının yaranma tarixi haqqında söhbət açaraq arzu edib ki, bu bayram bütün xalqımıza, millətimizə düşərli olsun.
Bayramın rəmzi olan Bahar qız əlində səməni musiqi sədaları altında məclisə daxil olaraq xalqımıza öz bayram təbriklərini çatdırıb. Şənliyə qatılan uşaqlar rəqs edib, mahnı oxuyub, şeirlər söyləyiblər. Kitabxananın əməkdaşları bahar fəslininin rəmzləri olan dörd çərşənbə haqqında məlumat veriblər.
Bayramın yaraşığı olan Kosa və Keçəl bir-birindən maraqlı səhnəciklər nümayiş etdirərək tədbirə rəngarənglik qatıblar. Onlar tədbir iştirakçıları ilə yumurta döyüşdürərək məharətlərini nümayiş etdiriblər.
Tədbir tonqal qalanması və kollektiv şəkil çəkdirilməsi ilə sona çatıb.
