Masallı “ASAN xidmət” mərkəzində “Aqrar biznes festivalı” baş tutub. Bu haqda məlumatı Cenublu.az bu gün, 14 mart tarixində verir.
Festivala Masallı, Lənkəran, Astara, Lerik, Yardımlı, Cəlilabad, Biləsuvar və Neftçala rayonlarından olan fermerlər qatılıblar. Onlara müxtəlif kənd təsərrüfatı təyinatlı texnologiyalar və məhsullar təqdim edilib.
Burada müxtəlif qurumların mütəxəssisləri dövlət və özəl sektorun əməkdaşlığı çərçivəsində fermer və sahibkarlara göstərilən dəstək barədə məlumat veriblər.
Tədbirdə Masallı RİH-nin başçısı Araz Əhmədov rayonda keçirilən bu cür tədbirlərin əhəmiyyətli olduğunu vurğulayıb.
Daha sonra Sahibkarlar (İşəgötürənlər) Təşkilatları Milli Konfederasiyasının vitse-prezidenti Vüqar Zeynalov, Qadın Sahibkarlığının İnkişafı Assosiasiyasının sədri Səkinə Babayeva, Kənd Qadınları Assosiasiyasının sədri Gülbəniz Qənbərova və başqaları çıxış ediblər.
Festival Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı və İqtisadiyyat Nazirliyinin tabeliyində Azərbaycan Respublikasının Sahibkarlığın İnkişafı Fondunun, İstehlak Mallarının Ekspertizası Mərkəzinin və Sahibkarlar Konfederasiyasının tərəfdaşlığı ilə həyata keçirilib.
