Masallı rayonu kəndlərinin birində 26 yaşlı Zakir qonşusu, 52 yaşlı Pərvanəyə (adlar şərtidir) təcavüz cəhdi edib. Bu haqda məlumatı Cenublu.az bu gün, 2 avqust tarixində Azxeber.com-a istinadən verir.
Belə ki, aşırı dərəcədə spirtli içki qəbul edən gənc cinsi ehtirasını ödəmək məqsədilə qonşusu Pərvanəgilə gedib və ona pul müqabilində birlikdə olmağı təklif edib. Qadın razılaşmayıb və onu təhqir edərək qovub. Zakir isə buna əsəbiləşərək, Pərvanənin üzərinə hücum edib, ona təcavüz etməyə cəhd göstərib. Pərvanə onun əlindən çıxaraq küçəyə qaçıb və qonşularına bu barədə məlumat verib. “102” xidmətinə zəng edildikdən bir müddət sonra Zakir polislər tərəfindən saxlanılıb.
İstintaq orqanı tərəfindən Zakir barəsində Cinayət Məcəlləsinin 29, 149.1-ci (zorlamaya cəhd) və 157.2-ci (mənzil toxunulmazlığını pozma, eyni əməllər zor tətbiq etməklə və ya zor tətbiq etmə hədəsi ilə törədildikdə) maddələri ilə ittiham elan edilib.
Cinayət işi baxılması üçün Lənkəran Ağır Cinayətlər Məhkəməsinə göndərilib. İş hakim Əli Əliyevin sədrliyi ilə araşdırılıb.
Məhkəmədə Zakir bildirib ki, təkbaşına 1 litr araq içdikdən sonra həmin gün özündə olmayıb. Qonşuluğunda yaşayan Pərvanənin ərinin öldüyü, oğlunun narkotik aludəçisi olduğu üçün türmədə olduğu, qızlarının isə gəlin köçdüyünü bilərək cinsi ehtirasını təmin etmək üçün onun evinə gedib. O, törətdiyi əməldən peşman olduğunu və barəsində yüngül cəza təyin edilməsini istəyib.
Məhkəmənin hökmü ilə Zakir 6 il müddətinə azadlıqdan məhrum edilib.
