Masallı Rayon İcra Hakimiyyətinin təşkilatçılığı ilə şəhid ailələri üçün ehsan süfrəsi təşkil edilib. Bu haqda məlumatı Cenublu.az bu gün, 17 sentyabr tarixində verir.
Məclisdə İcra Hakimiyyətinin başçısı Araz Əhmədov və aparatı, hüquq-mühafizə orqanlarının rəhbərləri, şəhid ailələri, eləcə də rayon ictimaiyyətinin nümayəndələri iştirak ediblər.
İlk öncə ümummilli lider Heydər Əliyevin, Azərbaycan Respublikasının ərazi bütövlüyü uğrunda və Ermənistan silahlı qüvvələri tərəfindən sentyabrın 12-də gecə saatlarında Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində törətdiyi genişmiqyaslı təxribatın qarşısı alınarkən şəhid olanların xatirəsi bir dəqiqəlik sükutla yad edilib.
Məclisdə Masallı RİH-nin başçısı A.Əhmədov, Qafqaz Müsəlmanları İdarəsinin Masallı bölgəsi üzrə qazısı Rəşid Talıbov və başqaları çıxış edərək şəhidlərin qəhrəmanlığından danışıblar.
Ehsan süfrəsində, həmçinin qazı R.Talıbov “Qurani-Kərim”dən ayələr oxuyub, xalqımızın və dövlətimizin firavanlığı, əmin-amanlığı üçün dualar edib.
Qeyd edək ki, tədbiri keçirməkdə əsas məqsəd şəhid ailələrini mütəmadi olaraq diqqət mərkəzində saxlamaq və onlara lazımi qayğı göstərməkdir.
