Masallıda "Sağlam məktəbli - Xoşbəxt gələcək" maarifləndirmə marafonu davam edir. Bu haqda məlumatı Masallı rayon İcra Hakimiyyəti verib.
Masallı Bioloji Təbabət Klinikasında başlayan maarifləndirmə marafonu Göyəçöl kənd tam orta məktəbində davam edir.
Görüşdə iştirak edən valideynlərə və müəllimlərə Masallı Bioloji Təbabət Klinikasının gerçəkləşdirdiyi tədbirlər haqda geniş məlumat verilib, onlara klinikanın hazırladığı bukletlər təqdim edilib. Klinikanın əməkdaşı, pediatr həkim Əsli Kalbalıyeva valideynlərə və müəllimlərə "Onurğa əyriliyi və onun yaranma səbəbləri", "Kəskin respirator virus infeksiyaları ilə mübarizə" və "Məktəbli şəxsiyyətinin psixologiyası" mövzularında təqdimatlar edib.
Qeyd edək ki, marafonunun həyata keçirilməsində əsas məqsəd, valideynləri müxtəlif mövzularda məlumatlandıraraq onların sayıqlığını artırmaq, valideyn və müəllimləri məktəblilərlə münasibətdə müasir yanaşmalarla tanış etmək, məktəblilər arasında sağlam həyat tərzini təbliğ etmək, bu yolla təhsilə və xoşbəxt gələcəyə töhfə verməkdir.
