Bu gün Vətən müharibəsi şəhidi Aqşin İbadovun ad günüdür.
Azərbaycan Ordusunun Xüsusi Təyinatlı Qüvvələrinin mayoru olan Aqşin İbadov 1984-cü ildə Lənkəranın Boladı kəndində anadan olub. O, 2001-2005-ci illərdə Heydər Əliyev adına Azərbaycan Ali Hərbi Məktəbində təhsil alıb. 2005-ci ildə leytenant rütbəsi alaraq hərbi xidmətə başlayıb.
A.İbadov Vətən müharibəsi zamanı Murovdağın, Füzulinin, Cəbrayılın, Xocavəndin və Zəngilanın azadlığı uğrunda gedən döyüşlərdə iştirak edib. 2020-ci il oktyabrın 19-da Xocavənd rayonunun Tuğ kəndi istiqamətində döyüş tapşırığını yerinə yetirərkən qəhrəmancasına şəhid olub.
Ölümündən sonra "Vətən uğrunda", "Cəbrayılın azad olunmasına görə", "Kəlbəcərin azad olunmasına görə", "Xocavəndin azad olunmasına görə", "Füzulinin azad olunmasına görə" medalları və "Rəşadət" ordeni ilə təltif edilib.
