Lənkəran şəhərində sahibsiz itlərlə bağlı narahatlıq yenidən gündəmə gəlib. Sakinlər bildirirlər ki, uzun illərdir davam edən problemə baxmayaraq, hələ də effektiv tədbirlər görülməyib.
Cenublu.az xəbər verir ki, redaksiyamıza daxil olan növbəti şikayətdə şəhərin müxtəlif küçələrində dəstə-dəstə dolaşan sahibsiz itlərin insanların təhlükəsizliyi üçün ciddi risk yaratdığı vurğulanır. İddialara görə, son vaxtlar itlərin aqressiv davranışları artıb və bəzi hallarda yoldan keçənlərə hücum edirlər.
Vətəndaşların sözlərinə görə, bu vəziyyətdən ən çox uşaqlar, məktəblilər və yaşlı insanlar əziyyət çəkirlər. Onlar bildirirlər ki, məsələ ilə bağlı dəfələrlə aidiyyəti qurumlara müraciət olunsa da, problem illərdir həllini tapmayıb.
Şikayətçilər sahibsiz itlərlə bağlı təxirəsalınmaz tədbirlərin görülməsini, şəhər sakinlərinin təhlükəsizliyinin təmin olunmasını və uzun müddətdir davam edən problemin nəhayət aradan qaldırılmasını istəyirlər.
