Lənkəran Dövlət Universiteti (LDU) 2023/2024-cü tədris ilində oğlan tələbələri üçün müasir tələblərə cavab verən yeni 250 yerlik yataqxana binasını hazır edəcək. Bu haqda məlumatı Cenublu.az bu gün, 29 iyul tarixində verir.
Yeni yataqxana binası universitetin 2 saylı korpusunda inşa olunub və burada oğlan tələbələrin rahatlığı üçün hər cür şərait yaradılıb. Otaqlarda zəruri məişət avadanlıqları və fasiləsiz internet mövcuddur. Yataqxanada idman, kitabxana və oxu zalı, informatika otağı və eləcə də istirahət guşəsi tələbələrin ixtiyarında olacaq.Yataqxana binasında videomüşahidə, yanğın əleyhinə siqnalizasiya sistemləri qurulub, internet və telefon xətləri çəkilib. 5 mərtəbə, 100 otaqdan ibarət olan tələbə yataqxanasında otaqlar 2 və 3 nəfərlik nəzərdə tutulub və çarpayı, soyuducu, sanitar qovşağı, fasiləsiz su, mətbəx ləvazimatları ilə təchiz edilib.
Lənkəran Dövlət Universitetinin rektoru, professor Natiq İbrahimov oğlanlar üçün nəzərdə tutulmuş yeni tələbə yataqxanasını LDU-nun 30 illik tarixinin ürəkaçan nailiyyətlərindən biri kimi dəyərləndirərək gələcəkdə bu işin davamlı aparılacağını, tələbələrin sayı artdıqca yeni yataqxana binalarının, kampusların inşa olunacağını bildirib.
Hal-hazırda LDU-da ölkənin bütün regionlarından 5400 tələbə təhsil alır və daha 2000 nəfərin yeni tədris ilində bu ali təhsil ocağına qəbulu gözlənilir.
Xatırladaq ki, LDU-da 2019-cu ildə qızlar üçün 160 yerlik tələbə yataqxanası tikilərək istifadəyə verilmişdi.
