Bu gün, 8 mart tarixində Cenublu.az öz oxucularına əslən Lənkərandan olan kamança ustası, vokal ifaçısı, Azərbaycan muğam, xalq və klassik musiqisini dünyada təbliğ edən Şəbnəm Abdullazadə haqda məlumat verir.
Şəbnəm Abdullazadə Lənkəran şəhərində anadan olub. 6-cı sinfə qədər Lənkəran şəhər 6 saylı tam orta məktəbində, həmçinin C.Cabbarlı adına 1 saylı musiqi məktəbinin 5-ci sinfinə qədər təhsil alıb. 1998-ci ildə təhsilini davam etdirmək üçün ailəsi ilə birgə Bakı şəhərinə köçür. Orada Bülbül adına orta ixtisas musiqi məktəbinə qəbul olunur. 2003-cü ildə Azərbaycan Milli Konservatoriyasının Musiqi tarixi və nəzəriyyəsi fakültəsinin Kamança ixtisasına qəbul olub.
Elə o illərdə müəllimləri İsrafil İsrafilov və Yadigar Muradovun dəvəti ilə Şuşa Dövlət Musiqili Komediya Teatrının solisti olur. 2004-cü ildə Vaqif İbrahimoğlunun dəvəti ilə müqaviləli YUĞ Dövlət teatrının solisti və aktrisası olaraq çalışıb. 2014-cü ildən Drezden Simfonik Orkestrindən dəvət alıb. Hazırda oranın solistidir.
2015-ci ildə Norveç musiqiçilər birliyinin dəvəti ilə Norveç musiqiçilər birliyinə üzv qəbul olunub. 2015-ci ildən Norveçdə yaşayır. Hər il ənənəvi keçirilən Kirsten Flaqstat Muzeyinin dəvəti ilə Kirsten Flaqstat festivalında çıxışlar edir. Ənənəvi keçirilən “Hamar Medieval”, “Hamar Music” festivallarında klassik Azərbaycan musiqisini təbliğ edir.
2017-2021 ci illərdə Gürcüstanda keçirilən "One Caucasus" festivalının musiqi redaktoru, səhnə üzrə direktoru və ifaçı-solisti olub.
2021-ci ildə Qazaxıstanda keçirilən "Asia's Got Talent" müsabiqəsində Azərbaycanı təmsil edib. 5 ölkədən olan 2000 iştirakçı arasından 2-ci yerə layiq görülüb.
2023-cü ildən Norveçdən savayı, həmçinin Amerikada yaşayır.
ABŞ-nin Şimali Kaliforniya Mədəniyyət Mərkəzinin dəvəti ilə 2 fevral 2024-cü ildə Gənclər Günü münasibətilə solo konsert verib.
Şəbnəm xanım musiqi fəaliyyəti ilə yanaşı, sosial və ictimai layihələrin də rəhbəridir. O, Azərbaycan Respublikasının Diasporla İş Üzrə Dövlət Komitəsi ilə sıx əməkdaşlıq edir. Azərbaycan mədəniyyət, bayram və matəm günlərinin keçirilməsində fəal iştirak edir.
