Lənkəranda şəhid ailələri və Vətən müharibəsi əlilləri üçün “Yurdumuza Novruz gəlir” adlı bayram şənliyi keçirilib. Bu haqda məlumatı Cenublu.az bu gün, 19 mart tarixində verir.
Tədbirdə Lənkəran ŞİH başçısı Taleh Qaraşov çıxış edərək Novruz bayramının xalqımızın həyatındakı yerindən danışıb. Bildirilib ki, Azərbaycanın Birinci vitse-prezidenti Mehriban xanım Əliyevanın böyük səyi nəticəsində Novruz bayramı UNESCO tərəfindən Qeyri-Maddi Mədəni İrs üzrə Reprezentativ siyahısına daxil edilib.
İcra başçısı bu il keçirilən Novruzun tariximizdəki özünəməxsus yeri barədə danışıb. O, bu ilin Lənkəranın tarixində də əlamətdar olduğunu qeyd edib. Onun sözlərinə görə, dövlət başçısının rayonumuza ilin əvvəlində tarixi səfəri, Lənkəranın “Gənclər Paytaxtı” və eləcə də “Türk Dünyasının Gənclər Paytaxtı” olması, yüzlərlə insanı işlə təmin edən dövlət və özəl müəssisələrin fəaliyyətə başlaması bütövlükdə lənkəranlılara dövlət başçısı tərəfindən verilən yüksək dəyər və qiymətin nəticəsidir.
Daha sonra icra başçısı “Heydər Əliyevin 100 illiyi (1923-2023)” Azərbaycan Respublikasının yubiley medalı ilə təltif olunan rayon sakinlərinə medallarını təqdim edib.
Qeyd edək ki, Novruz bayramı münasibətilə Lənkəran ŞİH şəhid ailələrinə və Vətən müharibəsi əlillərinə maddi dəstək də göstərib.
Daha sonra Milli Qəhrəman Ələsgər Əliyevin atası Ələkbər Əliyev, şəhid Vüsal Kazımovun atası Kamran Kazımov, şəhid Röyal İbrahimovun atası Qulam İbrahimov və şəhid Taleh İsmayılovun həyat yoldaşı Gülay İsmayılova çıxış ediblər.
Sonra tədbirin bədii hissəsi başlayıb. Rayonun mədəniyyət, folklor klublarının və incəsənət işçilərinin iştirakı ilə musiqi, rəqs nömrələri təqdim edilib.
